تفاصيلنا

أفكــــــار جهنـــمية
فكرة (1)"تظبيط "

غرفة بيضاء نظيفة ، تبدو و كأنها غرفة في مستشفى خاص .. الغرفة متسعة و في المنتصف سرير يرقد به شخص نائم متصل به عدة أجهزة و هناك من بعيد نافذة صغيرة يتلعق من خلفها ابليس صغير يحمل بيده هاتف محمول ..

ابليس 1 : وله ازيك واحشني شوي ! .. أنا تمام قريني نايم متلئح من شهر أهه
لا يا عم .. انا ضميري مرتاح ... أصله طب ساكت و هو بيظبط " يضحك "
و يبدو أن الطرف الآخر كان يضحك أيضا

" هنخليهم كلهم يظبطوا "

فكرة 2"موزاكرة"
غرفة في منزل .. ولد يبدو أنه يدرس .. يدخل الاب و معه كوب شاي : زاكر يا حمادة احنا أملنا فيك كبير يا حبيبي
قليلا و قبل أن يندمج حمادة في الدراسة تدخل الام و معها طبق فيه ساندوتشات : حمادة يا حبيبي .. انا قلت انتا جعت بعد ما اتعشيت معانا .. زاكر يا حبيبي انتا مش أقل من فيفي بنت عمك ان شاء الله هتجيب محموع كبير و تدخل صيدلة

تخرج الام و يرن هاتف حمادة : ايوة يا محمود .. ايه ملزمة ايه ؟ ايوة ملزمة اليالي العشر ما قبل المتحان ؟؟ يااادي النيلة !

و فجأة ينقطع النور ... و تبدأ أسئلة من نوع آخر يطرحها حمادة على نفسه و في الخلفية يظهر قرين حمادة أبو نظارة طبية : هوة ... هوة ربنا شكله ايه ؟ .. يعني هوة جه منين ؟؟؟؟؟

يحتاااااار حمادة ... و فجأة ياتي النور و يهرب قرين حمادة أبو نظارة
يمسح حمادة وجهه بكف يده : أستغفر الله العظيم !

فكرة 3 "حلال .. حرام "
طاولة في مطعم فاخر عليها ما لذ و طاب شيخ يبدو جالسا على المائدة و معه رجل يرتدي بدلة فاخرة و معهما قرين ما لم يتبين هل هو قرين الشيخ أم قرين الرجل ذو البدلة الفاخرة : يبدأ الشيخ بالأكل و يشاركه المواطن على استحياء .. و يدور بينهما الحديث التالي

- مولانا .. أنا عاوز الحلقة بتاعت البرنامج تبقى جامدة .. هه !
- متقلقش يا ابني في شوية فتاوي هتفجر الحلقة بكرة
- بجد ؟
يقول القرين " فكره بلازي منه"
- ايه أخبار اللي اتفقنا عليه ؟
- تمام يا مولانا
- و انا كمان تمام انا في الحلقة دي مش هخلي حد يغمض عينيه !

فكرة4" شخصية العام "

مكان غريب واسع مزين بشكل غريب و مريب مظلم و لكنه متوهج بظلمة الخطيئة مملوء بهم في كل اتجاه في كل ركن و كأنهم .. أي هذا الحشد مجتمعون لحدث مهم .. عفاريت الشر متناثرون في كل مكان .. و في العمق مسرح كبير .. ترفع الستار فيصعد أحدهم على المنصة : اليوم أعزائي الاباليس نكرم شخصية العام تلك الشخصية الجهنمية الافعال تلك .. التي قدمت أروع مثال على هدفنا الذي نعيش جميعا من أجله .. تعالوا بنا نكرم الابليس المتميز " عكننة "
" تصفيييق حااااااااااااااااااااااااااااااد " .. مشاعر متوهجهة .. الجو يزداد سخونة و احدهم يشبك اصابعه قائلا في نشوة " فلتحل عليه اللعنة "
يصعد عكننة يبدو ابليسا في سن صغير حلو كدة بتاع 16 أو 17 سنة يقول : انا في قمة فخري الان سعيد بكم جدا ... سأروي لكم ما حدث ببساطة .. هوة الحقيقة الراجل كان متجوز واحدة بس كان ليها تاريخ يعني و ربنا تاب عليها .. فأنا حسيت ان دي مهمتي .. مامتها مرضت و خرجت راحتلها المستشفى و نسيت تتصل بيه و كمان موبايلها كان فاصل شحن المهم الوقت اتأخر و مكلمتتش جوزها اللي مكانش موجود لما مامتها دخلت المستشفى و ما يعرفش حاجة ... أنا هنا حسيت انه جه دوري و فضلت أوسوسله .. هيه دي اللي لمتها من الشارع و عملتها بني أدمه و هوة ديل الكلب كدة ... و كل الحاجات اللي اتدربنا عليها طبقتها ... و فعلا هيه أصلا غلطانة و هوة مشحون مني طبعا فراح ... مطلقها
و هنا يصفق الجمهور " برافووووووووووووو " .

فكرة5
" ورشة عمل في جهنم "
- احنا التزمنا .. و آن الاوان نعمل حاجة ...
- اهلنا و اخواتنا بيموتوا كل يوم في العراق و فلسطين و احنا واقفين نتفرج
- لازم ندمر أمريكا
- لازم نضربهم ضربة رجل واحد فيتفرق دمهم في القبائل .
- ايوة هوة ده
- بس هنوصل فكرنا ازاي للبني أدمين دول ؟
- مش عارف
- مفيش غير غسيل المخ
- ايوة جاحة جامدة مووز و نتايجها مضمونة !
- ياله ؟
- ياله !
- الجرائد : " مصرع أكثر من ستة آلآف شخص في انهيار برجي التجارة في الولايات المتحدة "

فكرة 6 " زيارة متوقعة ! "

حديقة صغيرة يتناثر فيها العجزة هنا وهناك .. هذا يتمشى مع كلبه و الآخر يمارس شيئا من الرياضة .. احداهن تتناول دوائها من الممرضة دار العجزة تلك يبدو أنها في الخارج و يبدو ذلك واضحا من المعالم الأجنبية لرواد المكان ..
و يجلس أحدهم على كرسيه المتحرك متأملا صامتا كئيبا كأنما يسترجع تاريخا ما
بينما هو يتوجه اليه مقررا الصعود من باطن العذابات الى سطح الارض بكل خسته و حقارته مصطحبا معه لعنته الابدية و كل اللعنات بنفسه هو ذاته .. يهبط على السطح أمامه مباشرة و لا تبدو تلك من جلساته العادية .. فهو لا يأتي أبدا للقاءات العادية ..
يضع يده على فخذه : لطالما كنت تلميذا نجيبا لي و قد نفذت تعليماتي طوال عمرك الماضي بحذافيرها .. لكم أنا ممتن لأنني أراك هنا وحدك! .. و لكن اعذرني فأنا لا أملك قدرات الرب لأشفيك من الشلل الذي أصبت به و ليس بيدي حيلة لأعيد اليك ذاكرتك التي خربها المرض .. و لكن يمكنني أن أطلعك على عملك السابق الذي سخرته من أجلي .. أنت يا عزيزي حاكم سابق !

فكرة 7 " شاي بلبن"

- نعيمة اعمليلي شاي بلبن
"بسم الله الرحمن الرحيم نويت أصلي العصر "
الله أكبر: نعيمة عليها شاي الله يقرفها عليه .. يارتني قلت للبت زينب تعمله .. سمع الله لمن حمد .. يييييه نسيت أكلم الوله محمد يشوف للوله علي شغلانة معاه في الخليج ؟ و اللا أكلم سعيد أحسن ؟ ياله ربنا ييسر .. الله أكبر .. البت سمية مش عاجباني مش بتذاكر زي الناس ... الله أكبر ... هوة اللي فيهم عبده حبيبي ربنا يرجعك لينا سالم من الجيش يا ضنايا .. ييه الواحد مش هيعرف يشرب الشاي من ايد البت نعيمة ! .. السلام عليكم و رحمة الله ..
- بابا أنا عملتلك الشاي ...
- ايه القرف ده ؟! .. أنا طول ما أنا بصلي و انا بقول انك هتعمليه زي وشك!